TUAR A HAR NGEI E

Khawvel Guitarist ropui, khawvel rimawi kalphung thlak thleng dawrh thei, Rock ‘N’ Roll Band ropui Liverpool pum chhuak tlangval pali – John Lenon, Paul McCartney, George Harrison leh Ringo Starr te’n an din “The Beatles” guitarist George Harison a pawh khan hlaphuah a thiamin hla thluk siam a thim hle a ni ngei ang, a hlaphuah leh amah ngeiin a sak ni bawk te kha, khawvela hla lar ber ber leh hriat hlawh ber ber tun thlengin an la ni phak tlat a ni.
Zorimawi khawvela Guitarist hmingthang, 1970 chawhnu lam atanga 1990 chawhnu lam thlenga Rimawi huang a hriat hlawh ber te zinga mi 1990 chho vela, Aizawl khawpui chhul chhuak Rock Band hriathlawh tak “Tornado” Guitarist Lalchhuanawma, (Pa Chhuana tia hriat hlawh zawk) hlathluk siam “Tuar a har ngei e” tih hla mawi dangdai tak mai pawh hi hla daihrei tak chu a ni chiang mai. Pa Chhuana farnu, a u, K. Lalhmangaihi’n 1982-ah AIR Aizawl- ah thunin, a larpui hle a, chumi hnu reilote ah Peter C. Lalrinmawia’n AIR Aizawla a khung mai bakah a Audio-Album zinga hlawhtling leh hriathlawh ber “Laichhuat an chhir” tih Album-ah khan a telh zui nghe nghe a. Aizawl Radio Station mai bakah Commercial Album-ah telh ani ta zel chuan a hun lai na na na chuan mite hriat a hlawh phah lehzual hle a ni.
Kum 2000 bi a rawn her chhuak a, Mizo hmeichhe zai thiam zinga hlawhtling leh hriathlawh ber te zinga mi, Lalrindiki Khiangte (Daduhi) ngei mai chuan a duhthlu ve ngang aniange, a audio-album hnuhnung ber “Luang liam ila” tih album-ah khan mawi zet maiin a rawn sa thar ve leh ta bawk nen, he hlathluk mawi dangdai tak mai hian a daihrei dawn teh a nia.
Mahse, Pa Chhuana hian The Beatles Guitarist George Harison chu a tluk lo deuh a ni. Hlathluk mawi tak a siam a, a thluk mawi tak a siam thiam a, hlathu lamah erawh a hausa vak lo a ni. ‘Tuar i har ngei e’ tih hlathluk mawi tak mai, a hlathu mawi tak mai phuah khawm tu chu Lalthanzual Hnamte, heng hunlaia entertainment journal lar tak Ainawn editor, hla lar tak tak phuahtu hi a ni thung.
Kum 1970 chho vela khawvel puma Heavy Rock tilar tute zinga Musician lar ber leh hriathlawh ber te zinga mi, Heavy Rock Band turu leh rura, khawvel Rock Band te zinga huhang ngah berte zinga chhiar tel “Deep Puple” guitarist Richie Blackmore pawh kha hlathu lamah chuan a hausa vak biklo aniang, a hunlaia Deep Purple hla lar ber te zinga mi “Smoke on the water” tih hla pawh kha a hla innghahna chord leh a “Riff” chiah kha a phuah a ni a, a hlathu phuah khawmtute chu a band member puite an ni ve tho.
Zorimawi chanchina tingtang perhthiam hriathlawh ber pawl leh hnuhma ngah tak Lalchhuanawma (Pa Chhuana) hian hlaphuah sawi tur a nei lem lova. Hlathluk hrim hrim pawh a siam tam lo, a u K. Lalhmangaihi, a hunlaia Radio artist lar berte zinga mi, a farnu ngeiin a lo larpui tawh, tuna kan khel lai mek “Tuar i har ngei e” tih hla bak hi, hla dangah a inrawlh lem lo niiin a lang. Mahse, he hla thluk mawi dangdai leh lung kuai hnep hnawp hian Pa Chhuana ‘mi bik’ nihna a pho lang chiang hle a, Pathianin talent tha tak a pekte, Mizo mipuite lunglen hnem tur leh, mite beng titlai tura a chhawp chhuah avang hian rimawi ngainatute leh zaimi lungleng zoafate kan vanneih mai bakah amah ngei hi “Zorimawi” chanchinah hriat reng a ni tawh dawn a ni.
Kum 14 mi lek a nih lai atanga a u K.Lalhmangaihi zai mipui hmaa tingtangte lo perh sak thintu hlathluk lung tirun tak siam thiam Lalchhuanawma hi K.H. Robuanga (L) leh Tumsangi Tlau te inkarah 29th Nov. 1965 ah lo piangin unau piang panga zinga mipa awmchhun a ni a. Tingtang mai bakah, keyboard, phaiphuleng ham leh drums khawn te a ti thei vek bawk.
“Tuar a har ngei e” tih hla hi 1979 a phuah a ni a, a chang tawp ber leh a thunawn tho, a thu hrang deuh, he hla a phuah chhan nula hmeltha tak maiin a liam san tak si ah chuan, amah Pa Chhuana ngei pawhin, chu nula chu rilru na em em chunga theihnghilh ve hram tum chunga leng dang tang a belh ve mai a ngaih dawn thu a sawina, a tlang kawmna angreng deuha siam hi, 1980 kum bul lama an phuah belh a ni thung.
Pa Chhuana hi Guitarist ropui tak a nihna hi a larpui ber a, chutih rualin Drummer tha tak a ni bawk a, kum 13 mi lek a nih atangin Band puitlingah a play tawh thin a, Sweet Combination, Prisoners, Harvest Ministry, Tornado leh Forever Young-ah te a lo play tawh thin a, kum 1996 ah ama chenna New Street, Mission Vengah RB Recording Studio “RB Records” a din a, RB Records atanga tihchhuah Lalrindiki Khiangte album “Min Dem Lul Suh” Audio-Album te, Lallungmuana Album “Daisy” tih te, Zolawmsangi album hlawhtling em em “Duhlai” tih hla awmna te kha RB Records atang tihchhuah vek an ni nghe nghe.
RTC Lalduhawmi Audio-Album lar tak “Chatuan Lal Lian” Synod recording studio atanga tichhuah te kha Pa Chhuana kutchhuak liau liau a ni bawk.
Rock Legend Jeremy Zobiaka (JB-a) Gospel Album a hla thenkhatah tingtang a perhsak bawk a, 1980 tir lama indin, Aizawl Rock Band hingthang “Rock Wizard” Guitarist James B. Ralte pawh a play pui hman bawk. Aizawl khawpui nghawr nghing lawih thama 80s chho vela tingtang perh thiam hmingthang Rock Wizard Guitarist James B. Ralte chu Bank Manager tura Lunglei khawpuia kal a ngaih tak avangin Rock Wizard chu a ding chhunzawm reng thei ta lova. A hna avangin James B Ralte ngei pawh Leitlangpui lamah a awm ta. Heng hunlai hi Pa Chhuana ten tih takzeta rimawi lipui an liluh tan lai a lo ni bawk nen. James B. Ralte, Leitlangpui lama awm chu remchanga hmangin a u, K. Lalhmangaihi, RTC Lalduhawmi, Peter C. Lalrinmawia nen Leitlangpui lamah pheiin James B. Ralte ho in Lungleiah Concert ropui tak an va nei nghe nghe a ni.
SAARC Festival, Shillong khawpuia Garrison Ground-ah Kum 1986 khan buatsaih a ni a, hemi tum hian, Institute of Music & Fine Arts, Arts & Culture Department te zuk tawiawmin, IMFA Band Memberte nen Garrison Ground-ah hlawhtling takin an zuk perform a. Heng hunlaia khawvel band lar Dire Strait hla lar, So Far Away, Money For Nothing tih hla te an zuk thlawh vel a, State dang pavillion kalsanin, Mizoram pavillion lam mipuiin an bawr ta mup mup mai a, thuneitu ten IMFA Band zai lai chu an titawp hial a ni. Hemi tum hian Senior music instructor Joseph Zokunga a zai deuh ber a, R. Zothankhuma (Sena) Bassist niin, L.V. Dawnga’n Lead guitarist mawhphurhna a la a, Pa Chhuana hian Drums a khawng daih thung.
Lalchhuanawma (Pa Chhuana) hian tingtang a perh thiam avang leh zorimawi hmasawnna tura a thawhhlawk avang hian chawimawina (Awards) chi hrang hrang pali lai a dawng tawh a, chung zingah chuan PS Chawngthu Awards a tel ve nghe nghe a ni.
Zorimawi chanchina sulsutu ropui “Zorimawi Legend” T. Zorampela of Zodi tenen pawh Guwahati khawpuiah Art & Culture Department programme ah vek an zuk perh ho tawh a, E…tak a !!! Pa Chhuana hian Culcutta khawpuia PUC zir a awm laiin, Hotel Taj Bengal-ah Thai nula zai, “Another Bridge In the Wall” Pink Floyd ho hla an sak tumin a perh sak nghe nghe (zir lawkna hranpa vak an neilo lehnghal) Pa Chhuana hian a u K. Lalhmangaihi, a hun laia Radio Artist lar ber te zinga mi in Radio a hla a thun reng rengin, Musician angin a telpui vek nghe nghe bawk. “Tuar A Har Ngei E” tih hla lo pianchhuah dan thawnthu ngaihnawm tak i han tarlang tel hram teh ang.
Salvation Army Officer lar tak, Brig. K. Khara tunu, hmeltha fahran mai chu a sikul uniform a inhmeh bik riau ni hian a hriat a, Pa Chhuana rilru a luah khat thei hle ni tur a ni, Dawrpui Veng, Assam Rifles Biakin chhak chiah kawngpui anah hian Lalthanzuala Hnamte, Ainawn Chanchinbu Editor chuan Stationary dawr a nei a, a dawr hming chu “Highland Book Company” a ni nghe nghe. Brig. Khara tunu sikul bang chu Pa Chhuana hian he dawrah hian a lo nghak thin a, chu tleirawl duhawm zet mai nen chuan dawr hnuai chiah hahchawlhna pindan, dawra thil lei ten an chim buailohna tawk chiah, Aizawl khawpui tlak lampang zawng zawng lan theihnaah te chuan hlim em em in an inkawm fal thin a, chutiang reng renga hlim taka chhun ni an hman dun lai chuan, chu tleirawl lungmawl tak pawh chuan a thlahlel em em ve tho niin a lang.
Pa Chhuana hian a hmangaih em avangin he tleirawl hi nawmchen nan mai mai leh tisa chakna hrikthlak nan mai mai a phal thei lova, duh nise chutiang tihna hun chu an ngah ve tho ang.
Chutia inhmangaih tawn tak leh inthlahlel em em a chhunni leh zan te an chhiar emaw a tih lai chuan chu tleirawl hmeltha leh lungmawl tak chuan engmah sawi lawk lo leh inthen thu hla chu sawi loh, an kar a thuchhia thu tha emaw, engmah intih thinrimna leh intih tauhna chhete pawh nei lovin, zan khat thil thuah lengdang tang a beisan ta, zingkhua a lo var a, chanchin lungchhiat thlak takin Pa Chhuana a han den meuh chuan a thinlung chu ngunhnam a chhun ang maiin a na ta ngawih ngawih mai a ni, a dem awm reng reng love.
Lunglen sar hu a reh tawh hnuah pawh, a lung a leng chhunzawm veng veng lo thei lo, ni engemaw zat a liam hnuah chuan Pa Chhuana rilruah chuan hla thluk lunglen thlak tak mai alo lang ta. Chu hlathluk nen chuan Lalthanzuala Hnamte Dawr, Highland Book Company-ah chuan kalin Lalthanzuala Hnamte nen a thu a phuah rem ta zung zung a, a hmalama kan sawi tawh ang khan, Lunglen sar hu, a zualpui a reh hnuah a chang tawpna leh a thunawn bik hi an phuah belh leh chauh a ni. Brig Khara tunu hi tunah pawh ala hmeltha lutuk an ti.
He hla thu mawi tak lo phuah pumtu Lalthanzuala Hnamte hi heng hunlaia Entertaiment journal lar ber leh awmchhun “Ainawn” chanchinbu editor niin hla lar tak tak – Laichhuat An Chhir, Enchimloh Vulmawite etc. phuahtu a nih bakah, Zorimawi hmansawnna atana a tha thawh nasa ber te zinga mi a ni a, Ainawn chanchinbu bultumin “Pick Your Pop” awards te a buatsaih thin a, a hunlai na na na chuan miten an hlut thei em em a ni. Langsar tham tak leh History a ziah tel theih khawpa music awards sem hmasa ber leh buatsaih hmasa ber a ni hial awm e.
Sawi hmaih phal chi a ni lo tlat, Pa Chhuana hian Zorimawi khawvelah hian kawng hrang hrangin kutthlak a ngah hle a, Vanlalruati Gospel Audio-Album ah kut hnu a nei bawk a, Rintea solo album ah leh 2Y Tribal Power ah te, BT-a Album “Khuanu nge Setana” tihah te a kutthlak an tam ber a ni.
C. Dinthanga hla, collection album ah pawh khan hla pathum vel a perh bawk. Tin, Otto Recording Studio audio-album tichhuah, album hrang hrangah kutthlak a nei ve nual bawk a ni. Pa Chhuana hian Richie Blackmore a ngaisang hle bawk.
Hla phuah thiam lama hriat hlawh, Mizoram Zalenna sualtu te zinga chanchin ngah tak, mi ril, Pu Lalkhawliana fanu, Zothanchami nen kum 1992 khan ‘Tiam tlat e’ tiin he hmeichhe duhawm tak leh chhungkhat nu nih tlin tak nen hian chhungkua hlawhtling tak an din dun ta a, Pa Chhuana tana “Tuar a har ngei e” tih phuah chhuah lo ngai ta hial te kha thawnthu ngaihnawm mai an chang zo ta, Pa Chhuana hian Zothanchami nen hian fanau maltluan chawi dunin fa duhawm tak tak pali an nei a, New Street, Mission Vengah hlim takin an khawsa mek a ni. Pa Chhuana thiannu, Zothanchami hi hmelchhelo tak mai ani a, thenawmkhawvengte’n ‘Engtinnge Chami hian Pa Chhuana hi zuapa atan a pawm theih mai zawk?” tia a ruka an inzawh sep sep hi a bang ‘rihlo.
Ngaiteh, sawihmaih chi a ni hauh lo mai, Presbyterian kohhran Pastor hmasate zinga chanchin ngah tak, Pastor Liandova tunu zaithiam hmingthang, zaithiam piah lama sakhmel mawina avanga mite lawm rawn leh duhrawn, Gospel singer lar tak Liandingpuii Audio-Album hrang hranga a hla hrang hrang pasarih laiah tingtang a perh sak bawk a. Tin, Liandingpuii hla engemaw zat sound tract a siam sak bawk a ni.
Guitarist Pa Chhuana hian zirna lamtluang a zawh kual ve nual mai !! Mary Mount ah bul tanin, St. Pauls ah pawl riat a zir zova, College chu Govt. Aizawl College ah bul tanin Calcutta khawpui lamah te PUC vek hi a zuk zir zawm a, PUC tak hi chu Calcutta khawpuiah a zo thung. A hunlaia Radio Artist lar tak a u K. Lalhmangaihi nen hian Institute of Music & Fine Arts (IMFA), Art & Culture Department ah IMFA-a zir theih chin, Diploma Course chu an zirchhuak dun thlap bawk. Zai lam pawh a chemkalna lam a ni ve tho a niang, Govt. Aizawl College a kal laiin College Week Solo Competition-ah John Lenon a hla “Jea lous Guy” tih hla sa in, lawmman pakhatna a lo la ve hial tawh zu nia!! Zai lam aiin tingtang perh lam a tui miau si a. Tingtang perh lamah a lo insawrbing ta zawk ani ngei ang.
Engle khawle, Lengzem hla thluk mawi dangdai leh lung tirun “Tuar A Har Ngei E” tih hla thu mawi tak nen a hmawr han bawk dawn ila, a hla thu ngei mai chu i han chhawp chhuak teh ang le. A changtin hian thunawn a neih theuh avangin Pa Chhuana thil lo tawn a sawifiah chiangin a pholang chiang khawp ania!

by – C. Lalthazuala

TUAR A HAR NGEI E
Words : Lalthanzuala Hnamte
Tune : Lalchhuanawma (Pa Chhuana)
Satute : K. Lalhmangaihi
Peter C. Lalrinmawia
Lalrindiki Khiangte (Daduhi)
1. Duhlai Lungrung
I anka nem te a
Min chhal khan e
Thinlai a na ngei e
Hmangaih biahthu
Ka hlan tawh che a
Dawt thu tiin min chhal si
A na tuar a har ngei e.
2. Karah dawt thu
Tu in nge hlan ta che
Nge ni lengdang
I tawn zawk vang em ni
3.Ka van a duai nge
Aw ka lunglai mawl vang
Ka dawn vel hian
I iang ngei derthiam Di
Duhaisam di
Ka tawngta tiin
Kumtluang di-an ka thlang che
A riang chan reng hi dawn rawh
Nghilh reng i har ngei
Aw nang ngaihlai hian
Lung min len mahse
Hnawl zai ka rel zel tang
Ka liam tange
Suihlung mawl hi
Lengdang ka chhai tange
Nghilhni reng i awm thei dawn lo.

2017-07-02T08:09:44+00:00