SIPAI OFFICER-A TAN DAN

Brig. T.Sailo

March 12, 2013 khan I&PR Auditorium-ah Col. D.S. Phansalkar, Director, Army Recruiting Office, Zemabawk, thahnemngaihnain Army Officer-a luh theih dan kawng inhrilhhriatna hun hman a ni a, a lawmawm hle. Aizawl-ah hian Army Recruiting Office hi kan la nei rei lova; ARO Director lo awmte hian thahnem an ngai hle thin a, a lawmawm ka ti takzet a ni.

Tlem han tuihnih ve ka duh a, Mizo zinga Army Officer hmasa ber (?) Brig. T.Sailo leh a dawttu Brig. Vankunga te lo chu Colonel (Col.) aia sang kan nei lo. Kum 2004 atang khan Army Officer-a lut turin mi paruk (6) lai ka luhtir ve tawh a, an chhuanawm hle a ni.

Mizo thalaiten Mizoram pawna hnathawka an chhuah ngamna turin ka theih tawpin Articles tam tak ka ziak tawh a, All India Radio leh Doordarshan-ah te vawi tam ka sawi tawh a, Army Officer mai ni lo, Central Sorkar hnuaia Officer Group A leh B-a an luh theihna turin Sorkar Press Release-ah pawh kum 12 chhungin vawi 100 aia tam sipai lak chungchang ka ziak tawh a, chumi zinga vawi 80 vel chu Officer lakna tur thu a ni.

Mizo thalaite hian kan sukthlek kan tihdanglam a ngai nasa hle. Zai ringawt hian mi hlawhtling kan ni thei dawn lo; sum tlem tlem lut mahse, intodelhna a thlen lo. Kan zai taimak tluk hi chuan hnathawh taima ila aw, hma kan va sawn dawn rua em! Chhungkaw tin hian mahni intodelhna leh ram mipuite tan malsawmna, khawtlang leh ram tana chhete tala tangkai ve theihna kawng kan ngaihtuah a ngai a, theih tawp chhuahin hlawhtling ngei tura tanlak a tul tak meuh a ni. Sorkar hna hmu apiangin min dahna khua apiangah rinawm taka hnathawh a tul takzet a ni.

Kan thupuiah lutin Army Officer-a nih theih dan han sawi ila:-
1. UPSC kal tlangin: UPSC kal tlangin Officer-a luh dan chi hnih:-

1.(a) NDA & NA: National Defence Academy leh Naval Academy- hemi atan hian pawl 12 pass a ngai. Naval Academy leh Airforce-a lut turin Pawl 12 Science- PCM (Physics, Chemistry, Mathematics) lak a ngai. NDA&NA Exam hi kum tin vawi hnih, kumtir lam leh kOctober thla-ah neih thin a ni. Heta tlingte chu kum 3 chhung an zir hnuin Degree an pe a, kum khat dang an zir (trained) leh hnuin Officer-ah Leautenant/Sub Leautenant/Flying Officer-ah an tan. NDA&NA exam thei chu 10+2 pass, kum 17.5-19 inkar te an ni.
1(b) CDSE (Combined Defence Services Examination: kumtin vawi 2: kumtir lam leh kum tawp lamah buatsaih thin a ni. Hemi dil thei chu Degree nei, kum 19-23 inkar mite an ni. Exam-a tlingte chu kum khat chhung an training zawhin Permanent Commission Officer an lo ni a, Leautenant leh a tlukpuia dah an ni thin. Sipai Officer hniam ber chu Army-ah- Leautenant, Navy-ah Sub-Leautenant, Airforce-ah Flying Officer an ti. An hlawh: Pay Band 3: 15600-39100+GP 5400+MSP-6000: Rs 27000-in bul an \an a, thla khatah Rs 50000/60000 chunglam an la a tling. UPSC exam-a lutte hi Permanent Commissioned Officer an ni.

2. Short Service Commission Officers: Army HeadQuarters-a direct-a luh theih dan tlangpui: Kum 5 atan lak an ni a, kum 5 dang pawtseiin, kum 4 dang pawhsei leh theih a ni a; kum 11-ah Lt. Col. an kai thei a ni.
2.i) Doctor (MBBS/ BVSc&AH/ BDS) :Doctor te chu kum 45 thleng pawm theih an ni, a changin kum 32 te pawh an ni: Dilna hi Army Headquarters-ah thawnin thlante chu Interview tura koh an ni a, ni 5 chhung an test a, hrisel pang-ngai tan chuan tlin a harsa lo. Captain-a dah nghalin: PB:3 17160+GP 6100+MSP 6000: 29160+25% NPA nen Basic Pay-ah Rs 36450 hi an hmang a, an post azirin Rs 60000/80000 vel thla khatah an hlawh thei a ni. Army Doctor kan tihte hi- Army, Navy, Air Force, BRTF, Assam Rifles-ah an kal kual thei vek a ni. Kum 4 service-in Major an kai thei a, kum 11/13-ah Lt.Col. kaiin, Lt.Gen thleng an kaisang thei. Mizo Doctor tam tak Sipai Officer-a luh theihna chance tha tak, ram leh hnam humhimtu zinga tel theihna tha tak a ni. Thihna an tawh palhin pawhin Group Insurance Nuai tam tak an hmu thei.
2.ii) B.Sc.Nursing tan Military Nursing Services: Dilna chu Army Headquarters-a thawnin interview-a tlingte chu Leautenant-ah 15600+5400+4200: Basic Pay 25200 niin Rs 50000/60000-in bul an tan thei a ni. Diltu chu kum 19-25 in kar tan dil theih a ni thin.
2.iii) NCC’C’ Certificate te tan: Graduate kum 25 aia upa lo. NCC ‘C’ Certificate-a ‘B’Grade hmu tan a ni. Kumtin vacancy 50/60 vel a awm a, nula tan 8/10 vel dah ziah a ni. Interview-a tlingte chu OTA (Officers Training Academy) Chennai-ah thlaruk an training a, Lt-ah an zawm thin a ni.
2.iv) SSC Officer: Graduate chin, kum 25 aia upa lo, PG te tan kum 27 thleng pawm theih an ni. Anni ho hi OTA, Chennai-ah kum khat training hnuin Lt-ah dah thin an ni.
2.v) LLB te tan Advocate General Branch: kum 27 thleng pawm a ni. Lt.-ah zawmtir thin an ni a; training tir ve zel an ni.
2.vi) Women Special Entry (WSE): Graduate 50% chin, kum 25 chin tan kumtin SSC lak a ni a, OTA,Chennai-ah thla 6 training-in, Lt-ah dah an ni a, kum 14 thleng thawh theih a ni.

3. Technical Entry Scheme (TES):
3.i) BE/B.Tech chi hrang hrang te tan kumtin vacancy tam tak a awm. Army, Navy, Airforce-ah Technical mithiam hrang hrang- BE/BTech- Civil/ IT/ Mechanical/ Electronics & Communication, Electrical, Architecture mamawhna a sang em em. A bikin Navy leh Airforce-ah hian Technical mi mamawhna a sang hle. Kum khat training tir hnuah Lt-ah dah thin an ni.
3.ii) University Entry Scheme (UES): Engineering zirlaite, 3rd Year leh 4th Year te tan Campus Recruitment siam a ni thin. Final Year-a mite chu akum leh-a Officer turin an interview a, 3rd Year exam hote chu kum 2 hnua Army zawm turin an hual lawk thin a ni. Chuta an zawm chuan kum khat an training hnuin Lt-ah zawmtir an ni.

4. Technical Entry Scheme for 10+2 Science:
4.a)PCM te tan: 10+2-a Physics, Chemistry, Maths-a aggregate marks 70% hmu chin tan kum tin hawn a ni thin. Interview-a tlingte chu Army College of Enineering, Pune-ah kum li an training a, Officer ang chiaha enkawlin, an zirna senso zawng zawng Army/Navy-in an tumsak a, Jawaharlal Nehru University Delhi-in BE/BTech Degree pein, Lt-ah an dah thin. Zir chhungin Stipend tha tak an dawng. Zirlai bright, tumruh, Officer nih tum tan HSLC atanga inbuatsaih chu duhthusam a ni.
4.b) Army chawma MBBS leh BSc Nursing Zir: Armed Forces Medical College, Pune khu India rama Hospital tha 10 zingah a tel reng. 10+2 PCB (Physics, Chemistry, Biology)-a marks 60% hmu chin English-a 50% hmu tan dil theih a ni. Kum tin Seat 130 a awm a, mipa tan 105, nula tan 25 an dah thin. Sipai fate duhsak an ni a, mi dang tan pawh seat tam tak a awm ziah a ni. Sorkar chawm veka zir theih a, kum 6 an zawh veleh Permanent Commissioned Officer-in Captain-ah dah an ni a, amah erawhchu an zir zawhah kum 5 tal Army Medical Corps-ah thawk turin Bond signed a ngai. Hna an va hmu dawn chiang em!
Chutiang bawkin BSC Nursing zir turin 10+2 PCB-a 50% tal marks hmu tan kumtin zirna Pune-ah hian hawn a ni. An zir zawhah Military Nursing Service (PC)-ah Lt-a dah nghal an ni. Henga an zir chhung senso zawng zawng hi Army-in an tumsak vek thin.
Hriat tur: Army, Navy. Air Force-ah hian SC/ST tan Concession a awm ve lo. Tling chu tling, tling lo chu tling lo an ni mai. A Pathian thu hle a ni.
Short Service Commission tura Delhi-a interview-a kalte chu an kal man Railways A/C III Tier leh Bus man tumsak an ni thin.

by – R. Vanhnuaithanga MIS, Dy. Director ( source : https://dipr.mizoram.gov.in)

2018-07-25T12:13:58+00:00