LALTANPUIA TOCHHAWNG ( Biography)

Pian leh Murna:
Laltanpuia Tochhawng (Tanpuia/TPA) hi September ni 15, 1961 khan Thankhuma(L) leh Hrangziki te fa u ber dawttu ni turin Kawrthah, Mamit District khuaah a lo piang a. An unau hi 7 niin hmeichhia pali (4) leh mipa pathum (3) an ni a. A nu Hrangziki hian la dampuiin Kawrthah-ah Inpui a nghak mek a ni.
A unau te:
1. Ramhmingthangi w/o Rosiamkunga, Kawrthah
2. Lalnunpari w/o Lairokhuma, Mamit
3. Lalchawimawii w/o Lalzahawma, Kawrthah
4. Vanlalzawni w/o Lalnunmawia, Mamit
5. Lallawmkima h/o Zaithanthuami, Vaivakawn,Aizawl
6. Lalrempuia, Kawrthah
Nupui fanau:
Pu Tanpuia hian February ni 20, 1985 khan Lawmnapari d/o Rokunga (L) nen inneiin fapa 4 an nei a ni. Tunah hian Chawnpui Venga anmahni inah an khawsa mek a ni.
A fate:
1. Thlamuanpuia h/o Lalpanmawii, Sakawrtuichhun
2. Malsawmkima h/o Lalduhawmi, Chawnpui/CTI, Sesawng
3. Zaithanmawia h/o Edentharmawii, Chawnpui
4. Lalawmpuia h/o Ruby Laldinmawii, Chawnpui
Eizawnna :
Pu Tanpuia hian hmun hrang hrangah lehkha a zir kual hnuin nupui a neih hnuah Aizawl College atangin 1986 khan BA a zo a. BA a passed hnu hian sorkar hna a thawk tan a, sorkar hna department hrang hrangah a thawk kual hnuin tunah hian Economics and Statistics Department-ah thawkin a boral hma lawk hian Inspector-ah a kaisang a ni.
Rimawi khawvel lamah :
Pu Tanpuia hi naupangte anih lai atanga mi tumruh leh thil tih tawhna lama hlawhtlin ngei tuma bei thin mi a ni a, Zoram khawvelin a hmelhriatna ber rimawi lamah hian naupangte a nih atangin a tui tan a. Rimawi tumte hian hun tam tak a hmang thin a, mi lungleng thei tak niin a tleirawl lai hunte pawh lungleng taka zai nan leh hla phuah nan a hmang nasa hle. An khua Kawrthah atanga Matric a pass hnuah Aizawl lamah College a kal a, Lallianmawia Pachuau te nen inkawp chhoin an inzui nasa hle a ni. Lallianmawia Pachuau khan Pu Tanpuia hla hi 10 vel lai a sa a, a lar hlawm hle nghe nghe a ni.
Lallianmawia Pachuau-in a hla a sak lar tak nual hnu hian BA a lo zo ve ta a (BA a passed hma a mipui hriat hlawh khawpa zai a duh lo a), amah ngeiin ama hla phuah te a lo sa chho ve tan a. Ni 15 October, 1986 khan AIR, Aizawl-ah hla a thun tan a, heta tang hian Zoram mipui hriat a hlawh tan ta a ni.
Pu Tanpuia hian Album 3 a siam a,
‘Ka hmangaih ka rawn zawng che’,
‘Hmangaihna ka ngen a ni’ (1989 August)
‘Zoram khawvar hun nghakin’ (1992)
tih album a siam leh a, ‘Hmangaihna ka ngen a ni’ tih album hi Zoram khawvel hriata a lar chhuahna a lo ni ta a ni.
‘Hmangaihna ka ngen a ni’ album a hla Hmangaihna ka ngen a ni, Mampui ka duh ber che a, Ka lo haw thuai dawn, tih leh Jenny a tel ve lo tih hlate chuan Zoram khawvel a dengchhuak chiang hle a. Heng hlate bakah hian a hla phuah leh amah ngeiin a sak “Miten an hmu ve lo”, “Min hruai ve ang che” tih hlate leh a aihnahphahpui Lallianmawia Pachuau a sunna hla ‘Hmangaih LM’ tih hlate chuan hriat an hlawh hle a ni. ‘I hriat loh ka hlau thin’ tih leh ‘Ka duat ngawt ang che’ tih hlate hian Zoram khawvel a deng chhuak hle a ni.
Pu Tanpuia hian a hlaphuah leh a sak zingah chuan ‘Miten an hmu ve lo’ tih hla hi a duh ber a, ‘Mampui ka duh ber che a’ tih hla hi mawi a ti ber thung.
Hla 50 vel phuahin, 26 chu Radio-ah a record a, a zaithiam leh hlaphuah thiam avangin Lelte Award pawh a lo dawng nual tawh a. Mizoram pum huap Solo Competition-ah pawh lawmman pakhatna tum hnih lai a lo la ve tawh bawk a ni.
Vanduaina a tawh dan :
November, ni 1, 2015 tlaia a lengchhuak haw lam chu an In panna kawngah a chesual a, a chesual lai hmutute’n an theih anga rangin 7th Day Adventist Hospital-ah an hruai chho nghal a. A theih ang angin a hliam hi buaipuiin Oxygen-te an pe a, a hliam a nat deuh avangin Aizawl Civil Hospital-ah hruai chhoh leh a ni a. Doctor leh Nurse-ten theih tawp chhuaha an buaipui
chungin tlai lam Dar 6:10 khan a hliam tuar lovin a boral ta a ni.

2018-07-30T10:02:53+00:00