I LA HRIAT NGAI LOH COMMANDANT ROPUI CHU

Aizawl khawpui ruahmanna fel lohzia, traffic jam nasat zia, kawng tet zia, Lalthanhawlan Brig. T. Sailo plan a chhunzawm duh loh vanga traffic jam vanga kan buaina hi a nasa tual tual dawn.

Kan politician ten ka chauha ram an hmangaih laiin Granvile Henry Loch erawh hi chuan Aizawl khawpui hi khawpui ni turin kan politician ten an eiruk hmanga an in ropui an din theih nan a lo ruahman diam tawh mai.

Manding Putara(G.H Loch) hi Kum 1891 khan Mizoramah a lo chhuak a, Police Commandant a nih piah lamah Engineer a ni tel nghe nghe.
A lo chhuah phat hian Aizawl khawpui chhung kawng inkalpawhna tur lamlian a sial nghal a, Chanmari aṭanga Kulikawn thlengin kawng a lai a, pawisa sanction a tlem em avangin ama pawisa pawh a hmang ṭhen ṭhin a, Kulikawn aṭanga Dawrpui thlengin lung a phah a, a kawng laih sir tuaka phun tur eucalyptus, silver oak, far, leh thing dang dang a chah chhuak bawk a, Tlawnga mi lung la in Khatla kawn chung hi a rem phei zui mai a, lung mistiri thiam Khasi mi Sohan Roy a chah chhuak bawk a, kaw ruam thuk lai deuh te chu lei a chhung khat zel bawk a.
Mizoram synod hnenah a hlawh aṭangin press a pe bawk a, a hming chawiin Loch Printing press tia vuah a ni reng ṭhin a, tunah erawh chuan thlak danglam a ni ta.

LAMMUAL LAIH HNA
Khawpui chuan khelmual a mamawh dawn a ni tih a hre sa vek a, Kumpinu sawrkarah sanction a dil a, Rs 1200 chiah a hmu a, a daih dawn lo nasa si a, tihdan a ngaihtuah ta a.

Sipai canteen-a hlep chu lammual laih nan chuan a hmang ta a, sipai ho chuan lammual laih chu inhlawh nan an hmang a, inrinni chu chawlhah a puang a, sipai ho chuan zu in nan an hmang a, chumi zu man hlep chu hlawhfa chhawr nan a hmang ve zel a, a tawpa tawp ah chuan an lai zo thei ta a ni.
Ramdang mi mahin kan ram khawpui heti tak hian cheimawi tumin hna nasa takin min lo thawhsak a, a ram mite erawh chuan hmangaihna tak tak nei lovin kan enkawl hi chu siamtu rilru kan va tina dawn em!

by Apuia Tochhawng

2018-07-25T10:58:43+00:00