HALKHA PASALTHA HUAISEN RALBILHA

HAKHA PASALTHA HUAISEN RALBILA

Ralbila pianna leh seilenna Dawn khua hi AD 1700 vel bawrah khan Tlanglau hnamte’n an luah tan a, Tlanglau hnamte’n an rauh san hnuah, AD 1800 vel bawrah Lusei hnamte’n Dawn khua hi an luah ve leh niin hriat a ni. Lusei hnamin Dawn khua an luah hnuah AD 1850 vel khan Burma ram, Khuafo khua atangin Mualchin leh Fanchun hnamte’n Dawn khuaah hian awmhmun nghet an bengbel chho ve leh ta a, Pathian zarah vawiin thlengin Dawn khuaah hian mei a mit ta lo a ni. Kum 2000 March 29 khan Dawn khaw Kum 150 tlin champha lawmin Jubilee lung pawh an lo phun tawh nghe nghe a ni.

Ralbila hi 1855 velah Dawn khuaah hian a piang nia chhut a ni.

Ralbila Pa hi Zakhala a ni a, Zakhala fa 6-te chu hengte hi an ni –

1. Ralbila
2. Ancheua
3. Eipawa
4. Chawnheia
5. Khenkhuaia
6. Chiathluaii

He chanchin ziaka dahtha tu, Thawngvunga hi Ralbila unaupa Eipawa fa 5 zinga naupang ber a ni a, Thawngvunga fapa Ngunchunga fapa lehchhawng, Thawnga @Lal Pek Mawia (Melbourne Victoria Australia-a awm mek) chuan he thuziak hi min rawn thawn ve a ni.

Pasaltha Ralbila hi Hakha Pasaltha zingah chuan huaisen berte zinga sawi a ni thin. Ralbila hi palian tak leh hleitling zet mai a ni a. A iptepui ah te hi a ak chhing lung mai thin. A sambu a han phelh a a’n kal bu nghuau nghuau mai phei hi chu a huaisen hmelin a tawrawt hmel hliah hliah mai a. Dawn khaw Pasaltha huaisen, khawtlang tana thlamuanpui tham a tling a, a hunlai chuan “Hakha ram leh Lusei ramah amah hrelo fa an awmlo a ni” an ti hial. Lusei khuate phei chuan a hming ringawt pawh an tihkhai a, Naupang tap thlem nan tak an hmang thin. “Tap tawh suh Ralbila’n Sal atan a hawn daih mai tur che a nia” an tih tawh chuan, “Naupang tap zui ngam an awm ngai lo ve” an ti thin.

Ralbila hian In lamah leh ram lamah Thang a chhuah a, pasaltha huaisen zual bikte’n an chin em em hmelmate ram chhung a rawlrala che thin a ni. (Ral rama rawlrala che ngam Pasalthate hi Pasaltha rau rauah pawh mi bik, mahni inring tawk, mahnia ral bei ngam an ni a, an dah sang em em thin a ni.) He Dawn Pasaltha Ralbila hian ral ram atangin Lu kua(9) ngawt a khai haw tawh a. (Mizo Pasalthate zingah ral Lu pakaw khai hawng midang sawi tur an awm lo maithei..vnt). Heng mi lu a hawnte hi Lusei ral Lu vek an niin, Patling Nupui neilai thiau an ni. Pasaltha Ralbila hian nupa tang kua(9) ngawt a then tir tihna a nih chu. Chutiang khawpa pasaltha huaisen chu a ni.

RAL LAKA THI THEI LOA IN NGAI RALBILA LU CHAWNGTLAI SAHLAMAH

Ralbila hi a pian kum leh a thih kum dik tak hi hriat theih nilo mahse eng emaw chen chu chhui theih a ni a, Chawngtlai Lal Nikuala leh a pasaltha te’n an thah hnu khan a lu kha Sahlamah an khai a. He Sahlama mi lu an khai tan hi, kum 1887 leh 1892 inkara Chawngtlai Lal Nikuala leh a pasaltha ten Lusei chhan nana khawchhak Pawi ral nena an indo laia an ral thah lu an khaina atana an hman thin a ni a. Chawngtlai Sahlamah hian mi lu sawm pakua (19) lai mai an khai a, heng milu (19) zingah hian Ralbila leh a thiante lu pawh a tel ve a ni. Ralbila hi a thih hian kum 34 vel bawr a nia ngaih a ni.

Ralbila hi a hunlai chuan Lusei lalte zingah do ngam an awm meuh lova, Ralbila chanchin sawi hi chuan Lusei Lalte leh Lusei Pasalthate chu an khur chhe lo chauh zel mai niin an sawi thin. Mahse Lusei Lalte zingah amah do ngam an lo awm ta tlat mai a. Chawngtlai Lal Nikuala chuan Ralbila chu a hlau ve hlek lo mai. Tichuan Chawngtlai khua chu Ralbila hian a rawn bitum ta ngat mai a ni. Hetih lai hian Pasaltha hriat hlawh leh lar em em, Pasaltha Hranghleia, Hmar Pulun hnam chu Chawngtlai Lal Nikuala hian a nei ve bawk a. A ni bakah hian Chawngluta te leh midang tam tak, Keipui ang thiau, sawm chuang lai mai Pasaltha a nei niin an sawi thin.

Pasaltha Ralbila hian Chawngtlai bei tur hian amah ang bawka huaisen nia sawi, Chalnaka nen Chawngtlai run tum chuan an thawk chhuak ta a. Midang parukin an zui bawk a. Darzokai lam atanga kalin N.Vanlaiphai kaltlangin Biate-ah an inkulh ta rup mai a ni. Biate-ah hian an Lal Kairuma chuan (Heitih lai hian Kairuma hian Biate a la luah chiah lova, Karmualah a la awm niin an sawi) fing taka lo be tlawnin, Zu te a lo zuk a. Ralbila leh a hote chuan Funpui, Biate-ah hian an er ta a ni.

Zu an zuk a an chelh khaw muan chhung hian, Baite Lal Kairuma chuan Chawngtlai Lal Nikuala hnenah lamkal a lo tir ru a, a hmaa an lo intiam tawh angin Ralbilate lo kal thu hi Nikuala a va hrilh tir ta a ni. Ralbilate lah chuan hre heklo le. Ngaihtha takin an awm ve mai a.

Tichuan Biatea an cham hnu hian Chawngtlai lam panin an chhuak leh ta a ni. Hetia an kal hi Sialhawk ramah zan riakin an inkulh ngei a ni tih a hriat theih a. A chhan chu Sialhawk ramah hian, Chawngtlai pana an riahna nia sawi, ‘Ralbila puk’ an la nei a, tun thleng hian ‘Ralbila puk’ tiin an la humhalh tha tlat a ni.

Pawi Pasaltha huaisen Ralbila leh a thiante chu ni sarih zet Chawngtlai pan hian an kal a. A ni sarihnaah chuan Khawhai ram chhung an thleng ta.

Hetih lai hian Khawihai ram hi Chawngtlai Lal Nikuala ramvek a la ni a, a Lalna ramchhung Khawhai phulah Ralbila te pawh hi an lo chang a ni. Ralbila chuan hma hruaiin Vaibel a pet khu luih luih reng a. A Pawi sam tawnte pawh chu a bu nghuau nghuau mai a. Fimkhur takin hnim karah a silai hmawrin kawngchhak leh kawngthlang chu a hawl tawn zak zak reng a. A hnung chiahah Chalnaka’n a dawt a. Tichuan Khawhai phul an thleng phei ta maw tihah chuan, an inrin loh laiin kawnglai chhawl buk kar atang chuan, Silai a puak ta dur mai. Pasaltha hmingthang Ralbila chu a tlu tawp mai a. Mahse a la thih loh avangin a hming a chhal lauh lauh a. “Keimah Dawn Pasaltha Ralbila mi hrang sa hrang hmaa zam ngailo ka nih hi. Mi kawlh sa kawlh lakah Ralbilha ka ni ka zam ngai lo” a la ti chheu chheu mai an ti.

Ralbilate lam chan chu a chau ta hle mai a. Chawngtlai lam Pasaltha Chawngluta te chuan Pawi pasaltha Chawngtlai run tuma thawkchhuak ho zawng chu hmaih awm miah lovin an that fai vek a ni. Chawngluta’n Ralbila lu a lak dawn hian Ralbila chuan “Chawnglut, i chem a bil a nih kha, kha keima chem hian ka lu hi la rawh” tiin a chem a pe a. Ama Chempui ngei chuan Ralbila lu chu an la ta a ni.

Hetia Hakha Pasaltha huaisen Ralbila an thah tak atang hian Lusei Lalte leh Pawi Lalte inkarah indo a tawp ta nghal a, mi lu lak leh in run a lo tawp hlen ta a. Lusei Lalte’n Pawi lalte laka chhiah an chawi thin pawh a lo tawp ta a ni.

Tun hnua Pasaltha Ralbila tu leh faten an Pu chanchin an sawi thin dan chuan, “Kan Pu Ralbila hi Hakha Pasaltha zinga huaisen ber a ni a. Lushei Lalte nen indo thinin, ral lu pakua lai a la tawh a. A sawmna la turin funpui er meuhin a thawk chhuak a, Lu sawm(10) kim lawmna ni pahfawmin Lu lam paha Nupui neih a tum a. Mahse Chawngtlai Pasalthate’n lo lambunin a lu an lo la ta a ni” tiin an sawi thin.

Hei hi Hakha pasaltha lar leh huaisen Ralbila’n a khawvel zin kawng a zawh tawpna chu a lo ni ta a ni.

MRS – Vanneihthanga

2018-08-09T07:12:55+00:00