DURTLANG KAWNG ZAUH THU

Durtlang kawng zauh kan sawi tur hi Aizawl Bawngkawn aṭanga Durtlang Leitan inkar Km 2.28-a sei hi a ni a. Thangkhat lian awrh hma lam kha chuan Silchar kawngpui ber niin National Highway atana hman a ni ṭhin. He kawng hi Border Road Organisation-in enkawlin Defence Ministry hnuaiah General Service (GS) Road-a dah a ni a. A chhiat ṭhin em avang leh a zim em avangin a hlauhawm thei em em a. Kham sang tak panga kal a nih avangin a hlauhawmzia hi a larna leh sawi a hlawh berna pawh a ni ṭhin. A kawng a zimin a chhukchho bawk si a. Ruah sur nal ṭum leh chhum zin lai phei chuan zawitea kal a ngai ṭhin. Accident pawh a tam a, mi tam tak thihna hmun leh kawng huaisar tak a ni. Mizoram la kal ngai lo phai lam aṭanga lo kal Bus-a lo zinte hian Durtlang leitan an rawn pel a, Durtlang kham kawng zimte mai an rawn dak chuak thuta kham panga an han tlan an hlau lutuk an ṭah tak rikngawt thute pawh kan la hre ṭheuh awm e.
India sawrkarin Silchar leh Aizawl inkar National Highway-a hmanga siam ṭhat a tum khan he kawnga kal hi tih chi niin an hriat loh avangin Kawnpui aṭanga Tlawng kamah Sairang lama kaltir tumin hma an la ta zawk a. Chuvangin khatih hun lai aṭang khan Durtlang kawng lam hi chu sial zauh tum tawh chuang lovin a awm ang angin an hnuchhawn a, kawngpui atan hman tum tawh lo mahse BRTF kutah erawh chuan a la awm tho a, Mizoram PWD pawhin enkawlna mawh an la bawk lova, hnuchhawnsan leh ngaihsak hlawh lo takin a awm a, chutih laiin he Durtlang kawng kan sawi erawh hi chu zim teh mahse, Durtlang khua leh a piah lamin Aizawl an panna kawngpui ber leh Durtlang damdawiin panna kawngpui ber a ni reng a. A enkawltu mawhphurtu berten kalsan an tum mek a nih bawk lawi si avangin kawng buaithlak leh fahrah tak a ni chho ta a ni.

Kum 1998 kum tawpa MNF-in sawrkarna a lo chan veleh Chief Minister Pu Zoramthanga chuan he kawng hi a vei nghal chat a, kawngpui pawimawh ngaihsaktu nei lova a awm chu ṭha ti lovin a rilru a la em em mai a ni. Chutih lai chuan Chief Minister Bangla hi Tuikhuahtlang-ah a awm a. MNF sawrkarin kum khat a kai chho ṭan tih kum 1999 December ni 27 niin India Defence Minister George Fernandez-a chu Aizawl a rawn kal a. Zingah Chief Minister Pu Zoramthanga chuan thingpui a inpui a. Chutih lai tak chuan Prime Minister Office aṭangin an rawn phone a, India Airlines thlawhna chu misualin an hruaikawi (Hijack) thu leh buaipui nghal a ngaih thu an rawn hrilh a. Tin, Pu George Fernandez-a pawh chu a chuan nan Helicopter an rawn tir nghal a, Aizawl aṭanga Agartala thlawk chho a, chuta ṭanga Delhi pan nghal turin an rawn hrilh nghal a.

Defence Minister chuanna tur Helicopter chuan Zemabawk Helipad a lo thleng a, chumi pan chuan Pu Zoramthanga ho chuan thlah turin an kal nghal a. Amaherawhchu Pu George Fernandez-a leh Pu Zoramthanga hi hun rei tak aṭanga lo inkawm nel tawh leh Kristian ve tho a nih avangin an inngam dun bawk a. A hnenah chuan Pu Zoramthanga chuan, “Pu George, minute sawm chiah ka hijack ve dawn che a, Bawngkawn aṭanga Durtlang road chhe em em mai hi min hmuhpui zet tur a ni,” a ti a, Chief Minister car-a chuang dun an ni a, Pu Zoramthanga chuan driver chu Helipad pan lo a, Durtlang kawng a chho turin thu a hrilh a, an tlan chho ta a. Durtlang leitan an thlen hnuin an kir leh a. Kawng chhiat leh hlauhawmzia a taka an paltlang hnu chuan Pu Zoramthanga chuan, “Pu George, hei hi i Defence Ministry hnuai General Service aṭanga BRTF-te enkawl a ni a. Heti khawpa chhia leh hlauhawm hian kan khawpui hmun pawimawh pahnihte inkar a zawm a ni a. Mi tam tak an thi tawh a, chuvangin engemawti kawng tala siam ṭhatna tur kawng zawngin Delhi-ah i Defence Headquarters emaw, Army Headquarters-ah emaw ka lo kal dawn a. A siam dan tur min lo ngaihtuahpui ngei a ngai ang,” a ti a. Pu George Fernandez-a pawhin “Ni e,” a ti ve mai a. Tichuan Helicopter-ah an thlah liam ta a ni.

Pu Zoramthanga chuan rang takin PWD hotute hnenah Durtlang kawng chu siam zau dawn ta ila engzatnge ngai ang tih a hisaptir ta a. Anni chuan laih zauh vak chuan a harsat tur bakah leimin thar tur a hau tak hle dawnin an hria a. A theih ang chin chin chu kawng thlang lam aṭanga lungrema dawl zau a ṭul ang an ti a. Tichuan hun engemawchen an hisap a, a zirchian hnuin cheng vaibelchhe nga vel chuan kan zo thei mai ang an ti a. Chutihlai chuan Mizoram ang State te tak te tan chuan nuai zanga chu pawisa tam tak a ni a, hmuh chhuah pawh huphurhawm tak a ni.

Hun engemawti chen an buaipui hnu chuan Pu Zoramthanga chu Delhi -ah zinin a lo sawi lawk tawh ang ngeiin a buaipui zui ta a, Army Headquarters-ah General-ho nen an inhmukhawm ta a ni. BRTF hotute, Army Headquarters-a kawng enkawltu General-hote leh Home Ministry-a Secretary pawimawhte nen chuan an ngaihtuah ho ta a. Eng kawng leh eng enkawlna hnuaia mi nge an tih chuan Defence Ministry hnuaia General Service enkawl a ni an ti a. Anni chuan BRTF kuta pek leh enkawl a ni an ti bawk a. Tin, BRTF hotute chuan National Highway kawngpuia Aizawl hi pawh tura laih mek a ni tih leh chu kawng chuan Tlawng dungah Sairang lam aṭangin Aizawl chu pawhtir tum a ni an ti a. Chu kawngpui siamna tur Fund chu a lo hman theih mai lawm ni an tih chuan, “He Durtlang road lamah hian a kal dawn loh avangin a theih loh” an ti si a. Mizoram PWD-in an la tawh em tih chuan an la la lova, BRTF kuta mi a la ni, an ti bawk si a. Chuvangin engti kawng mahin kawng kalsan mek tan cheng nuai zanga han pawh hek chu a tih theih lovang, tih chu an thu hnuhnung a ni chho ta a, kawng siamna tur fund zawn dan chu a ping tak zet zet a ni.

Chutah, Mizoram Chief Minister Pu Zoramthanga, awm lo ata sum Peace Bonus pawh sawi chhuak thei chu thapui thawha a chet a ngai ta a. Durtlang kawng zauh a nih theih nan a kawtawpa ṭangin, “Old Delhi leh New Delhi inkarah hian kawng zim leh hlauhawm tak awm sela, chu chuan kham kar kaltlangin mi tam tak accident-in tla hlum tawh sela. Sawrkara mawhphurtu lian chuan engti kawng pawhin Fund dapin insiamtir ngei ang. Fund hmuhna tur remchang ber pawh ka hre bik lo. Amaherawhchu German lawnglian Bismark an tihin British lawng a kap chhe tam tawh lutuk a, Churchill-a mangangin ‘Bismark lawng hi in tichhe ngei ngei tur a ni; engtinnge tih chu engti kawng pawhin pawi ka ti tawh lo’ a tih ang khan kei pawhin he Durtlang kawng hi chu kan siam tur a ni; khawi aṭanga a pawisa (fund) chu hmuh tur nge ka hre bik lo; mahse kan hmu ngei tur a ni” an ti bur mai a. An han inrawnkhawm nak nak ṭhin a, a ngaihna an hre bik lo hle mai a, an mangang ve khawp mai. A tawpah chuan Home ministry-a Joint Secretary North East changtu Pillaia mangang chuan, “Department of North East Region (DONER) aṭangin pek dan kan lo zawng ngawt mai ang e,” a ti ta a. Tichuan mi tih ngai loh leh fund hmuh chhuah dan pangngai pawh ni hauh lovin engemawti tihin nuai zanga chu Pu Zoramthanga Chief Minister chuan a ṭhahnemngaihnain a hnukchhuak thei ta a ni. He mi thuah hian Central lam a zuk dawrte pawhin mak an ti ve ngang a ni ang, an nuih te pawh a han za letling leh bawk a. Chutah Pu Zoramthanga chuan, “He Durtlang Road hi chu luhlul chhuaha Political Forcep (Chaicheh)a kan hnuhchhuah hram a nih hi” a ti ṭhin reng a ni.

Tichuan engemawti ti chuan kum 2003-ah pawisa chu DONER aṭanga lo chuak theiin July thla vel aṭang chuan kawng zau leh siam hna chu ṭan theih a ni ta a, a kum leh mai July 2004-ah chuan an zo fel thei ta a ni. (Mamit kawng 2011 atan 2014-a zawh tura tih tun thlenga la zo lo ang chu a ni ve lo.. Ztu) A tira sawi angin kawng laih zauh vak chu a remchan loh avangin a theih ang ang lai zau chungin kawngthlang lam chu lungrema dawhzawl a ni a. Chubakah kawng kalte him zawk nan kawngsir thlang lamah kalna (Pavement) ṭha takin Pu Zoramthanga ruahmanna angin siam a ni bawk a. ‘Tiang chuan, mi kawng pian dan ang ni vak lovin engemawti ti chuan Durtlang road chu siam zauh a lo ni ta hram a ni.

Kawng siam zawh a nih meuh chuan rin aiin a lo zauvin a lo ṭha a, kawng thlang lama kalna leh tlak dal siam chu a lo fuh kher em bawk a, lirthei tlan a tinuam hle. Siam zawh hlima Durtlang khaw paho lawm lutuk chuan, “Leitan aṭanga Bawngkawn kan han tlan thleng chu a hma ngaihtuahin a innawm hleih ta lutuk a, Bawngkawn thlen veleh tlan hawn chhoh leh ringawt mai hi an duh tawh a ni,” an ti ṭhin ( Tunah erawh ngaihsak hlawh lovin a chhe lutuk a, tiang chuan an sawi tawh hauh lovang le.. Ztu)

A siamna Fund hmuh a harsa bawk a, a siam a harsa bawk a, siam zawh a nih meuh chuan ropui taka khuallian siama hawnna neih mup mup awm tak kha a ni a. Amaherawhchu khang hun lai khan Pu Zoramthanga Chief Minister remhriatna leh taimakna azarah khatih lai khan PMGSY leh World Bank aṭang kawng laih leh hawn theih chi apui kha a tam a, hawn ringawta buai kha hman ni hek suh. Urhsun taka hawn awm leh phu tak Durtlang kawng pawh chu hawnna ceremony awm chuang lem lo chuan kan kawng pangngai zawh liam hlen ve ta mai mai chu a nih tak ber hi.
Han ngaihtuah let hian he kawng zauhnaa rilru, ngaihtuahna senga tumna tak tak nena hma latu hi fak a phu a, he kawng hian ‘Zoramthanga Road’ tih hi a phu ngawih ngawih a ni.
Hruaitu Arsi, March 2018.

by HP Zonunsanga

2018-07-25T10:23:39+00:00