CHHUIHTHANGVALA

Lalnunmawia
1. Di nen tlai tla eng ruai hnuaia’n maw,
An leng vel zaleng zawngte chu;
Mahse, suihlungleng valmawia chuan maw,
Lunglen zai sain di a au.
*Thunawn*
Dawn ve ang maw! A di ve khan,
Chhuihthangvala ar ang a vaih hi;
Hnem thiam awm ang maw!
Damlai khawvela’n, awm hian ka ring lo.
Ana em! Lunglen zawng.
2. Nemte’n lunglen tuar nan ti zelin,
Chawltui ningzu dawn zai a rel;
Mahse, a nem thei dawn chuang em ni le!
Awi! Ṭah ruai ruai a lo nuam ta si.
3. Hai leh ruiin zan mu a chhing ta,
Engtak tawnmanga’n tawng ang maw!
Hai ang ṭhanga suihlung vaih hmabakin,
Awii! Mang lama’n a di au e.
Kum a lo vei ve leh ta nual mai, Tape rocord kan play emaw, mi dang play pawh ni rawh se. He hla Lalnunmawia’n a sak dawna music intro. a rawn ri chho kha chu tu’n kan hai lo. Hetia han sawi lehtakah chuan, Leili hmanga lead guiter thiam, sawi tur leh mitthla tur kan hriat phah ṭeuh ngeiin a rinawm. A hla thu pakhatmah a sak hma, music ringawt pawh hi sawi tham fe a awm mai dawn! Duh tawk ang. Hla hi eng nge? ‘Thu chu hla a ni a, hla chu thu a ni,’ an ti ngawt nain, hla ni tur chuan, kalphung nei leh awmze neia thu puanchhuah tur chuan thluk a neih angai ṭhin a nih hi maw! He hla a phuah hun hi sawi chiang dawn ta ila, amah Pu Valtea ngei pawh hian a sawi chiang thei dawn em ni? Kum khat thawthang a thluk a lo neih lawk, faifuk tea saa ṭingṭang nen mahni awm hmuna a lo rem vel mai mai ṭhin chu thu a hnawh khat lehin, he hla hi a lo piang a, a thluk a neih tirh kha nge a phuah hun hi a thu a neih zawk kha a phuah hun atan kan pawmsak a, a sawi tak ang? Shillong an awm lai 1977 *Ṭhal Favang Kŭt*ah mipui hmaah a sa chhuak ta chauh kha a ni si a. Hemi ṭum hian pakhatna a nihpui nghe nghe a, AIR Aizawl lamah voice test-a ṭum hnih ngawt an lo hnawl tawh, Lalnunmawia lo zai thiamzia chu AIR lam hotute chuan an lo hre rang kher mai. Voice test pawh awm tawh loin B-grade Artist pawh a bul ṭan loin, B-high artist atan an lak nghal hmak phah ta a nih kha.
He hla hi kan en chuan tlangval pakhat lungleng em em mai chanchin a ni ber mai a, chu tlangval, bialnu ngaia kùr vel chu tu dang ni loin, he hla phuahtu Lalnunmawia (Valtea) ngei hi a ni lawi si. Amah leh amah chu mi hranah inchanin hla a inphuahsak piap mai. A va neu lo em! Chu a hla phuah chu mite’n a hming lemah hmansakin *Chhuihthangvala* tih chu mi tamtak hriat dan a lo ni ta hial mai. Kan peng thui dawn lovang, a hlain eng lam nge a kawh tih hre turin, ‘YMA hruaitu dawihzep ruih hlo vai,’ an sawi ang deuh puat puatin i thlir tlang leh te’ng aw.
Mi kawr thar nei leh bungraw thar nei hi chu thengthawngah a thawk lem lo, zawnglai tan chuan e, Ngaihzawng te awm loh lai a, “… vangkhaw dai lam rawna, Ṭuanpui di nena tlai tla par ang lawm a,” mite leng a han hmuh takah chuan, rualawh a tinain, Lunglenna lam hla sa a, a hmel duh ve deuhte suangtuahna mitthla reuh reuh pahin a zai ve tak hial chu!
He laia tlangval baihvai tak hi, chu nu (a thinlai luahtu) chuan rawn ngaihtuah ve tak ang maw! Lunglen hi a la na em mai a, Khawvel mihring dam lai zingah hnem thiam an awm hian ka ring lo hial a ni. (He lai a thunawna *Chhuihthangvala* a thluk/lam dan inang lova a han ti te hian, ngun taka a hla ngaihtuah lo thei loin min siam a ni.
Sil damdawiah leh chaw ei huai nan mah an hman chuan tiin, lunglen damdawi atan zu han in ve ngial mah se, a rui lung puam hi a zualzapui vailenhlo an tih ang chauh hi a ni ang a, a ṭap chiam zawk mai ang tih a va hlauhawm em!
A in ta ngei a, a ruih pawh a rui ngei, zan a han muhil ve ngei nain, a mumangah engtak chu hmu ang maw! Fam Lalzova’n an ṭhianpa zu rui chatthla hla a phuah khumna ang deuh khan, “I tawnmangah di nge i tawn Setana?” Tia zawhna pek tak ka nap! Mahse, mumang lamah pawh ngaihzawngte au a hun hmang leh tho tur ta chu; a rawn harh leh huna lungleng baihvaia hun hman hmabak leh mai tur a ni si.
Hetiang hla chuai ngai tawh lo tur Zofate min phuahsak a, thiam taka satu Lalnunmawia hi Tunah Chawlhhmun Aizawlah a khawsa mek a ni.

By MS.Dawngliana Pachuau

2018-03-19T18:49:08+00:00