AIZAWL DIARY (70’s – 90’s)

NAUPANG –
An țhing ve tlangpui vek a, intihhlimna tur an tlachham hle. School ah Bag ni lovin ipte an ak fur thin a, lehkhazira in el bur burna leh nu ten naupang School a hruai duah duah an la ching ve lo. School chawlh a an tih ber chu inbailemchhuan, in T-Set(In Birbie a la awm lo), Bûk sak, Aizawl hnaiva lui kal, thirchhe zawn leh hralh, Ball chhe deuh deuh pet a ni tawp mai. Thimhlimah pawnto ni chiah lovin khawlaiah naupang an tam thei hle bawk.Hmawmsawm eitur a la tam lova, Muri hlawm, chatuan Sweet, Burma Plywood, essi chhang te kha a ni tawp mai. Hlum hmanga thil siam, saihlum, theihai lem tihte kha School a WE te a ni thin. “Uite rim in nam” tih an hlawh zing hle.

ELECTRONICS –
A la tam lo hle. TV nei chu hausa tak an ni. Star TV a la awm lova, a hmuhnawm pawl chu Chitrahar, Rangoli leh He-Man Cartoon te kha a ni. Fakna hmuhnawm an ti thei hle a, Nirma faknate, Zandu Baam te chu a lar pawl a ni. Pawna TV Antenna her a ngai a, au lauh lauh a ngai thin. Bangla a man fuh chuan intihtheih thlak tak a ni. Radio leh Tape Record ring tak taka Play an ching hle a, aw thun(Record) an hrat hle bawk. A hnu lawkah Deck Tape a chhuak a, in Play rin siak leh Sound Box in neih that siakah kan in el. Tape in Cassette reel chu a ei thin a, pen leh Pencil in kan thing vir a, kan Rewind/forward thin. A play na lai tak chu lehkha in kan kam tut bawk thin. Nula rimna leh khawlaiah Tape khai chhuah an la chinga, an khai zai ul ul thin.Video Player nei kha chu hausa tak an ni. An bangawng te kha a hlu em em thin a, naupang atanga puitling thlengin Video nei hauh lovin Cassette man chawiin an hawh a, a chhuahna tur an zawng kual thin. Video neite chhuat chu a hnum hlurh thin a, an bathlarah Sleeper an tam thei hle bawk.

LIRTHEI –
City Bus a la awm lova, Town Bus a ni. MST Bus lian chi a Service a, Driver bul chiah ah a Engine Bawm pawngpur mai chu a awm a, a lum vut vut a, naupang an thuttir thin. A Gear chu sei tak a ni a, a kawi ngauh bawk. Bus chuan kha a pui a pangin nuam kan ti hle thin. Taxi chu a dum a ni a, a chung a eng thin. Khang hun laia Taxi chuang par par reng thei kha chu ngaihsanawm tak an ni. Bike a tam lova, Bullet, RX-100 leh Scooter Bajaj Chetak te chu a lar pawl a ni mai.

NUNPHUNG –
Nun a Simple hle a, tuikang nghah leh tui chawi kha hnapui pakhat a ni. Tuikhurah te an in rim thin a, tui țin(Laal Gulab, Pachak, Mustard oil) tih chuang te chu kan hre lar hle. Mipa in Bata sleeper an bun a, keartui leh ke zungpui zawn a dâm duk a, a chhuat pawl rawng a lang ruai thin. Hmeichhia in Beeter an bun thin a, an nawt fai thei hle. Kungfu Shoe bun ching pawh an tam hle bawk. Inrinni chuan Aizawk bul hnai lui te chu insu an intlar put a, chaw te an pai bawk thin. Hmeichhe tui chhipchhuan banphar zakhmul awm ser sur an la tam hle bawk. Mitthi an awm khat a, an awm chuan darkhuang kawtin veng chhung an fanga, an vaw ri dur dur a naupang ten an hlau thei hle. Christmas Bazar ah chhungkuaa kala in kaih duah duah an ching hle. Urlawk zante chuan ar kang pha chin chu nei zo deuh an ni a, a tlangpuiin Chow an kang hnuk thin. Innei an awmin lawi ar ruk an ching hle a, inneih hma zanah ‘Chhang Pack zan’ a awm bawk thin. Ruaithehna hrim hrimah mihring an tam thei hle.LT-Jacket, Beetle Shoe leh Leather Jacket a lar hle bawk. Sunday tlaiah Thlanmual leh hmun thenkhatah leng an tam thei hle bawk.

INCHHUNGKHUR –
Choka ah chuan thingthuk leh meikhuchhuahna Chimney lian tak a awm fur a, thing thingrem sei, buhfai dahna a chung chu thutthleng ni nghal, Cushion awm ngei khan an in tihhmuh viau bawk. Gas nei hmasa kha chu changkang tak an ni. Sitting Room bang velah chuan Poster tar an ching hle a, en fe tham a awm thin. Bang kilah chuan Tape Record an hung rana a bul bangrelah chuan Tape Cassette Number pek thlap mai chu an tlar dul thin. Room hran te te a awm lem lova Bed Room chu khumin a khat dul bawk thin.

POLITICS –
Politics tak tak kan man lova, inthlan dawnte chuan Campaign Office chu a lun hle a, vengkhatah Party hrang hrang Campaign Office inhnaih tetein a awm a, an chei țial nasa in Tape an Play ring thei hle a, ruai an in țheh siak thin. Party Sticker bial tereuh tete an sem a, naupang atanga puitling thlengin hmaiah an bel tiar tuar a, Party lukhum te an khum sup sup thin.

ZAI & ENTERTAINTMENT –
Zaithiam an la tam lova, kan zaithiamte chu Calender tiat lekah an thlalak a lenga, kan tar fur mai. Sap zai kan la hre tam lutuk lova Mizo zaithiam hmasa ten ngaihsan leh ngaihhlut an hlawh hle. Hmuh kan chak hle a, a chibai pha chinte chu an intithei hle thin. Thangkura Drama Party an lar hle a, Album thar Promote nan veng hrang hrangah an Show kual a, kan khat hung thin. An Cassette kan in chuh a, kan Play chuah chuah a, naupang thlengin an tawng dan kan bel hle a, kan phun rem pui zat zat thin. Cinema Hall a rawn lar a, Zodin, JL, AR leh Zemabawk Pushpak ah chuan Cinema en an tam thei hle bawk.

KOHHRAN –
Camping Crusade te khan kan la hlut hle a, Evangelist kan nei tam lo, a awm chhunte chu Councillor thleng khan an Luck thei hle. Christmas leh kumthar ruai nawn rei thei Kohhran chuan ngaihsan an hlawh thin hle bawk.

source: David Sailo (MIZO SPECIAL REPORT)

2018-07-25T10:49:43+00:00